giovedì 16 febbraio 2017

La santità: dventé ‘d gent a part (Duminica 19/2/2017)

La santità: dventé ‘d gent a part


Leture bibliche për ë l 19 Fërvé 2017 - Duminica apress l’Epifanìa ch’a fà set
L’Evangel ëd Gesù Crist a visa ‘d rende possibil ant na përson-a un cambiament, na trasformassion an soa manera ‘d pensé e ‘d fé. Lolì a l’é lòn ch’a consist la santità che la Bibia a na parla: creé ‘n pòpol, ëd gent an pas con Nosgnor ch’a viva an armonìa con Sò volèj arvelà. A l’é l’angagg dij ver cristian grassie a l’euvra che lë Spirit Sant a fà an lor. Sossì a l’é l’acent ëd le leture bibliche dë sta sman-a.

Orassion: Nosgnor! Ti ‘t l’has mostrane che sensa amor tut lòn ch’i foma a al pròpi gnente. Manda Tò Spirit Sant e arversa an nòstri cheur tò cadò ël pì grand, ch’a l’é l’amor, ver vincol ëd pas e d’ògni virtù; sens’ ëd lor, chichassì ch’a viv a l’é considerà mòrt dëdnans a Ti. Acordane son, për amor ëd tò Fiueul ùnich, Gesù Crist, ch’a viv e ch’a regna con Ti e con lë Spirit Sant, un sol Dé, ora e për sèmper. Amen.

giovedì 9 febbraio 2017

Për toa nòrma e régola (Duminica 12/2/2017)


Për toa nòrma e régola
Leture për ël 12 ëd Fërvé 2017 - Duminica ch’a fà ses apress l’Epifanìa  

Trascrission

Nosgnor Dé a l’ha creà tut l’univers conform a ‘d régole e ‘d lej precise che la siensa a jë studia. L’istess Nosgnor a l’ha fàit për l’umanità, che Chiel a l’ha creala. A l’ha dane ‘d régole ‘d condòta ch’a garantisso nòstra vita al mej. La përson-a ‘d bon sens a jë rispeta. Lòn che Nosgnor a l’ha fàit an Gesù Crist a l’é arsané nòstra umanità arvirosa e ‘d portela torna an armonìa con Nosgnor. Sto-sì a l’é l’acent dle leture bibliche dë sta Duminica.

Orassion: Nosgnor, ch’it ses la fòrsa ‘d coj ch’as fido an Ti! Aceta, për Toa miserìcòrdia, nòstre preghiere e, përchè da noiàutri i podoma fé gnente ‘d bon sensa ‘d Ti, dane l’agiùt ëd Toa grassia, për che quand ch’i scotoma ij Tò comandament, i podoma dete piasì, tant an la volontà che ant ij fàit; për Gesù Crist, nòst Signor, ch’a viv e regna con Ti e con lë Spirit Sant, un sol Dé, për ij sécoj dij sécoj. Amen.
Deuteronòmio 30:15-20: 1 Corint 3:1-9; Matté 5:21-37; Salm 119:1-8

mercoledì 1 febbraio 2017

Esse diferent e fé na diferensa (Duminica 5/2/2017)


Esse diferent e fé na diferensa
5 ëd Fërvé 2017 - Duminica apress l’Epifanìa ch’a fà sinch
Trascrission

Da cost mond arviros e condanà, Nosgnor a l’ha sernusse un pòpol ch’a renda testimoniansa ëd fej, d’amor e d’ubidiensa a Soe lej bon-e e giuste. Sto pòpol, Soa gent, a l’ha da esse ‘l ciàir e la sal dë sto mond. Ës pòpol a l’é da identifichesse con l’antich pòpol d’Israel e peui con coj che, an tut ël mond, as fido al Signor e Salvator Gesù Crist. Ës pòpol, contut, a l’é nen semper ëstaje fedel. Ant coj moment ëd cativa testimoniansa, Nosgnor a l’ha mandaje ‘d profeta për arprocelo e për giutelo a torné a soa vocassion originaria. Le leture bibliche dë sta sman-a an compagno a comprende mej cola ch’a l’é la vocassion dij cristian.

Leture: Isaia 58:1-91 Corint 2:1-12Maté 5:13-20; Salm 112:1-9

Orassion: Nosgnor! Fane lìber da le caden-e ‘d nòstri pëccà, e dane la libertà ‘d cola vita bondosa ch’it l’has fane conòsse an Tò Fieul Gesù Crist, nòst Salvator; ch’a viv e regna con ti, ant l’unità dlë Spirit Sant, ora e për sèmper. Amen.

venerdì 27 gennaio 2017

La benedission ëd l’umilità (Duminica 29/1/2017)

Video

Nosgnor Gesù Crist a dovra soens ëd paradòss për fene pensé bin ai fàit ëd la vita, për dësfidene a bandoné la manera ‘d pensé stòrta dë sto mond e vardé tut da la prospetiva ‘d Nosgnor. Ant le Beatitùdin Gesù a proclama beat, bonuros, ëd categorìe ch’a smijo esse bin lontan-e da esslo. Cole ch’a son e përchè?

Trascrission dël mëssagi: La benedission dl'umilità

Leture bìbliche dël lessionari - Duminica 29 ëd Gené - Quarta Duminia apress l’Epifanìa

Michèa 6:1-8;  1 Corint 1:18-31; Matt 5:1-12Salm 15

Orassion: Nosgnor, Tut-potent e etern, ti 't governe tute le còse, sìa an cél che an sla tèra. It pregoma: sie misericordios e scota le sùpliche 'd tò pòpol, e ant ël temp d'ancheuj dane toa pas; për Gesù Crist, nòst Signor, ch'a viv e regna con ti e con lë Spirit Sant, un sol Dé, ora e sèmper. Amen.

sabato 21 gennaio 2017

Col pòpol, ch’a vivìa nt lë scur, a l’ha vëddù ‘n gran’ ciàir (Duminica 22-1-2017)


Leture bibliche për Duminica 22 ëd Gené 2017 - Tersa Duminica apress l’Epifanìa

“Col pòpol, ch’a vivìa nt lë scur, a l’ha vëddù ‘n gran’ ciàir”, sossì a dis l’antica professìa ch’a l’é compisse quand che ‘l ministeri ‘d Gesù ‘d Nasaret a l’é anandiasse an Galilea ai sò dì. L’istess a séguita ancheuj fin dal moment che d’òm e ‘d fomne a scoto la vocassion dl’Evangel, as ancamin-o dapress a Gesù e as anlùmin-o. Le leture bibliche për la tersa Duminica apress l’Epifanìa.

Ij test da lese: Isaìa 9:1-4;  1 Corint 1:10-18Maté 4:12-23; Salm 27:1, 5-13

Orassion: Nosgnor! Dane la grassia ‘d rësponde pront a l'apel ëd nòstr Salvator Gesù Crist, e 'd nunsié a tuti la Bon-a Neuva dla salvëssa ch'a l'ha procurane, për che nojàutri e 'l mond antregh a peussa rendse cont ëd la glòria 'd soe euvre maravijose; ch'a viv e regna con ti e con lë Spirit Sant, un sol Dé, pr' ij sécoj dij sécoj. Amen.

giovedì 12 gennaio 2017

Gesù a l’é ‘l ciàir ëd tute le nassion (Duminica 15.1.2017)


Leture bìbliche dël lessionari - Duminica 15 'd Gené, Sconda Duminica apress l’Epifanìa

Ël mond, nòst mond, da la mira moral e spiritual, a l’é ant lë scur, ant ël top. A l’ha da manca d’un ciàir ch’a-j fasa lus. Ël ciàir, contut, a l’é vnù, ma la pì part dla gent a smija ch’a preferissa sté ant lë scur. Nen mach a l’anvisca nen, ma fin-a a dëstissa coj ciàir ch’a-i son. Nojàutri, teston, a l’anviscoma torna col ciàir. A l’é Nosgnor Gesù Crist, ‘l ciàir ëd tute le nassion. Le leture dë stra Duminica a na parlo.

Isaia 49:1-7 1 Corint 1:1-9; Gioann 1:29-42; Salm 40:1-12

Orassion - Nosgnor tut-potent, dont nòst Salvator Gesù Crist a l'é la lus dël mond: Acòrda che tò pòpol, anluminà da Toa Paròla e dai Sacrament, a peuda bërluse con la radiansa dla glòria 'd Crist; che Chiel a sìa conossù, adorà e scotà fin-a ai confin dla tèra; për Gesù Crist, che con Ti e con lë Spirit Sant a viv e regna, un sol Dé, ora e për sèmper. Amen.

martedì 3 gennaio 2017

Ël sërvent ëd Nosgnor (Duminica 8.1.2017)



Leture bibliche për Duminica l’8 ‘d Gené 2017, la prima Duminica apress l’Epifanìa - Ricorensa dël Batèsim ëd Nosgnor Gesù Crist

Le Scriture Sante antreghe a l’han për sò bu ëd presenté al mond Gesù Crist, col che Nosgnor a l’ha stabilì për salvé l’umanità dal pëccà e për ristabilì la comunion dj’uman con Dé, sò Creator. Ij profeta dël Testament Vej a presento ‘l Salvator an manere diverse. Nòstre leture d’ancheuj an lo presento coma ‘l Sërvent ëd Nosgnor pr’ ecelensa. La presentassion ëd Gesù Crist an pùblich e l’inaugurassion ëd sò ministeri a l’era stàita fidà a Gioann ël Batesator. Ant l’ocasion ëd col batèsim Dé ‘l Pare a lo proclama ciàir e lë Spirit Sant a lo consacra ‘d manera ufissial. Coll-lì a l’é ‘l contnù dla sconda letura. La vtersa letura a l’é ‘n tòch dla proclamassion dl’apòstol Pé ch’a fortiss che chionque a chërd an Chiel a 'rseiv l’armission dij pecà grassie a sò nòm.

Leture; Isaia 42:1-9;  At 10:34-43 Maté 3:13-17 Salm 29

Orassion: Pare dël cél! Ti, che, ant ël batèsim ëd Gesù ant ël fium Giordan, it l'has proclamalo tò Fieul bin-amà e ch'i l'has onzulo con lë Spirit Sant: acòrdane che tuti coj ch'a son batesà an sò Nòm a sìo fedej al Pat ch'a l'han fàit e ch'a lo confesso coragios coma Signor e Salvator; che con Ti e con lë Spiri Sant a viv e a regna, un sol Dé, an glòria eterna. Amen.