Pare nòstr - La Lej 'd Nosgnor - Ël Chërdo dj’apòstoj

Ël “Pare nòstr” (ò Pater, ò “Orassion dël Signor”)

Costa Orassion dël Signor an é prescrivùa coma ‘n model dël tut përfet ëd nòstre orassion, vòt e desideri. As treuva in Maté 6:9-13.
Pare nòstr, ch’it ses ant ij Cej, ch’a sia onorà tò nòm. Ch’a ven-a tò regn, ch’as fasa tòa volontà coma ‘n cel parèj an tèra. Dane ancheuj nòst pan cotidian. E përdon-ne ij nòstri débit, coma noi i-j përdonoma ai nòstri debitor. E fane nen droché an tentassion, ma liber-ne da la mal. Përché a l’é a Ti ch’a aparten ël regn, e la potensa, e la glòria për sèmper. Amen.
----------

La Lej ‘d Nosgnor

La Lege ‘d Nosgnor an é dàita për regolé nòstra vita (nòstra condòta). Coma régola o nòrma ‘d lòn ch’a pias e a l’é giust dëdnans a De, a l’é staita comendà da Crist e da ij Sò sant Apòstoj. Pr’ esèmpi: “Sté nen a chërde che mi i sìa rivà për dësfé la Lege o ij proféta; i son nen rivà për dësfeje, ma për porteje a compiment” (Maté 5:17); “L'é-lo, donca, ch'i anuloma la Lege con la féj? An gnun-e manere! A l'opòst, i confermoma la Lege” (Roman 3:31).

---------

Ël somari dla Lej

“(34) E quand ij Farisé a l’an sentì ch’a l’avìa sarà la boca ai Sadducé, a son radunasse con l’istèssa intension. (35) E un ëd lor, ch’a l’era ‘n dotor dla Lege, për butelo a la preuva a l’ha ciamaje: (36) “Magister, qual é-lo ‘l pì grand comandament dla Lege?”. (37) Gesù a-i dis: “Ti ‘t voreras bin al Signor, tò De, dë tut tò cheur, dë tuta toa ànima, e dë tut toa ment. (38) Sto-sì a l’é ‘l prim e ‘l pi grand comandament. (39) Ël second, parèj ‘d col-là, a l’é: Ti ‘t voreras bin a tò pròssim coma ti medésim. (40) Da sti doi a derivo tuti j’àutri comandament” (Maté 22:34-40).

--------
Ij Des Comandament

"1Anlora De a l’ha prononsià tute se paròle-sì:  2“Mi. ël Signor, i son tò De, col ch’a l’ha fate seurte da la tèra d’Egit, da la tèra andoa ti j’ere s-ciav.

I. 3It l’avras nen d’àutri de ‘dnans a mi.

II. 4Ti it faras nen ëd mistà scolpie ò na quàich simijansa dle còse ch’a stan sù an cel, o an sla tera o sot-tèra. 5T’it butras nen an ginojon dë 'dnans a cole ròbe-là për dij servissi religios, për che mi. ël Signor, i son un De gelos, ch’a castiga la colpa dij pare an sij fieuj fin-a la tersa e la quarta generassion ëd coj ch’am arnègo 6e che smon-a soa benevolensa a mila ‘d generassion ëd coj ch’am veulo bin e ch’a ubidisso ai mè comandament.

III. 7I dovraras nen ël nòm dël Senior fòra ‘d leu, përché ‘l Signor a lassara nen andé impunì chionque a dovra ‘l nòm dël Signor fòra ‘d leu.

IV. 8It visaras dël dì ‘d Saba e lo ten-ras da cont coma ‘n dì fòravìa. 9Ti’t podras travajé ses dì e fé an coj dì-là tut ël tò travàj, 10ma ël dì ch’a fà set a l’é ‘n dì consacrà a Nosgnor tò De. An col dì lì i faras nen dij travaj, nì ti, nì té fieul, nì toa fija, nì tò servidor, nì toa serventa, nì toe bestie, nì ‘l forësté ch’a stà an toa cà. 11përché an ses dì Nosgnor a l’ha fàit ij cej e la tèra, e ‘l mar e tut lòn ch’a-i stà, e a l’ha arposasse ant ël dì ch’a fà set, parèj che Nosgnor a l’ha benedì ‘l saba e a l’ha consideralo fòravìa coma ‘n dì sant.

V. 12Rend onor a tò pare e a toa mare, parèj che ti’t peusse vive motobin dj’agn an sla tèra che ‘l Senior tò De av dà.

VI. 13It sassineras nen.

VII. 14It comëttras nen n’adulteri.

VIII. 15It robaras nen.

IX. 16It rendras nen na fàussa testimoniansa contra tò vzin.

X. 17It susneras nen la cà ‘d tò vzin. It susneras nen la fomna ‘d tò vzin, nì sò servidur, nì soa serventa, ni sò beu, ni sò aso, ni ròba qualsèssia ch’a sia dèl tò vzin.

--------

Ël Chërdo dj’apòstoj

Mi i chërdo an De, Pare tut-potent, Creator dël cel e dla tèra. 

E in Gesù Crist, Sò ùnich Fieul, nòstr Signor. 
Ch’a l’é stàit concepì d’Ëspìrit Sant, ch’a l’é nà da Marìa vèrgin. 
Ch’a l’ha patì sota Ponzio Pilàt, ch’a l’é stàit butà an sna cros, ch’a l’é mòrt e l’è stàit sotrà. 
Ch’a l’é calà giù ant j’ìnfer, ch’a l’é arsussità dij mòrt ël ters dì. 
Ch’a l’é montà sù an cel, a l’é setasse a la drita ‘d De, Pare tut-potent. Da là a vnirà për giudiché ij viv e ij mòrt. 

Mi i chërdo an l’Ëspìrit Sant, la santa Cesa catòlica (universal), la communion dij sant, la remission dij pecà, l’arsurression dla carn, la vita eterna. Amen.


Nessun commento:

Posta un commento