La sostansa 'd nòstra fé

Corta declarassion ëd lòn che nojàutri i chërdoma

La Sacra Scritura, ch’a rend testimoniansa da chila a soa vrità e che a l’’é vrità, a pretend ubidiensa sensa riserve an minca area dla vita, përché a l’é Paròla ‘d Dé. Contenùa ant ij 66 liber dël Vej e del Neuv Testament, a peul nen sbalièsse e a l’é na testimoniansa completa e unificà ‘d lòn che Nosgnor a l’ha fàit për nòstra redension e che a culmina ant l’incarnassion dla Paròla viva, ël Signor Gesù Crist. La Bibia, ispirà ‘d manera ùnica e pien-a da l’Ëspirit Sant, a l’é l’autorità màssima e final an tute le question dont a parla.

Dzora së fondament nojàutri a fortiuma ij seguent trat essensiaj dla nòstra fé.

1. I chërdoma ant un sol Dé, ël Creator sovran e Sostenitor ëd minca còsa, përfet ëd manera anfinìa e ch’a esist da l’eternità an tre Person-e: ël Pare, ël Fieul, e l’Ëspirit Sant. A Chiel ch’a vada ògni onor, glòria e làuda për sèmper.

2. Gesù Crist, la Paròla viva, a l’é vnì òm con ël moien d’un concepiment miracolos për l’oevra de l’Ëspirit Sant ant ël vènter ëd Marìa soa mare, quand che chila a l’era ancora vèrgin. Col ch’a l’é Dé genit a l’é dventà n’òm genit, unì ant una sola Person-a për sèmper. Gesù a l’é mòrt an cros coma ‘n sacrifìssi për nòstri pecà conform a le Scriture. Al ters dì Gesù a l’é arsussità con sò còrp dai mòrt, a l’é montà al cel, andoa, a la drita dla Maestà an àut, a l’é ‘l nòstr Sacerdòt massim e ùnich Mediator.

3. L’Ëspirit Sant a l’é vnù për dé glòria al Crist e për apliché l’euvra ‘d salvëssa dël Crist ai nòstri cheur. A l’é Chiel che an dà la convinsion dij nòstri pecà e ch’an tira al Salvator. An pijànd residensa an nòstri cheur, Chiel an dà vita neuva, la forsa e ij don ch’i l’oma dabzògn për serve Nosgnor. Chiel an instruìss e an guida an tuta la vrità, e an sugela për ël dì dla rendension.

4. Dàit che i l’oma dëstacasse e slontanasse da Dé, e i soma condanà da Chiel a càusa ‘d nòstri pecà, nòstra salvëssa a dipend mach da Nosgnor e a l’é fondà mach an soa gràssia, cola che dë manera libera e sovrana an dà ant ël Crist. Nosgnor a credita Soa giustissia a coj che, për esse salvà, a buto soa fé mach ant el Crist. An cola manera Nosgnor an giustifica ai sò euj. Mach coj ch’a son ëstàit argenerà për l’euvra del Sant Ëspirit e a rissèivo Gesù Crist coma sò Salvator e Signor, a dventan fieuj ëd Dé e a arsèivo an ardità la vita eterna.

5. La vera Cesa a l’é fàita mach ëd cole përson-e che, për ël moien ëd soa fé salviìfica an Gesù Crist e l’euvra ‘d santificassion dl’Ëspirit Sant, a son unìe ansema ant ël còrp dël Crist. La Cesa a trova soa espression visìbil, conbin che difetosa, an comunità dël pòst, andoa la Paròla ‘d Dé a l’é predicà an soa purëssa e ij sacrament a son ministrà an soa integrità; andoa a l’é praticà la dissiplìn-a conforma a le Scriture e andoa ch’as ten an débit cont l’amor da fratej.

6. Për esse perfëssionà, la Cesa a speta l’artorn dël Signor Gesù Crist. Coma Gesù medèsim a l’ha promëttù, Chiel a artornarà an su la tèra ‘d manera personal, visìbil e con un còrp, për giudiché ij viv e ij mòrt e për porté a conclusion la stòria e ij sò progèt etèrn. “Col ch'a fà fé 'd coste còse a dìs: "Sicur i ven-o bin prèst!". Amen, ch’a sia parèj. Ven, Signor Gesù!” (Apocalìss 22:20).

7. Ël Signor Gesù a comanda a tuti ij chërdent ëd proclamé l’Evangèli travers al mond e ‘d fé dle nassion ëd dissépol. L’obediensa al Gran Mandat a domanda n’angagg total a “Col ch’a l’ha volu-ne bin e ch’a l’ha dàit Se medèsim për nojàutri”. Chiel an ciama a na vita ‘d sacrifissi, ëd bin e ‘d servissi. “Përché i soma fàit da Chiel, an essend creà an Gesù Crist për le oevre bon-e che Nosgnor a l'ha prontà, a fin ch'i caminoma an lor” (Efesìn 2:10).

Costi trat essensial dla dotrin-a cristian-a ch’i chërdoma, a son presentà an manera pì detajà an sla Confession ëd Fé ëd Westminster.