Vàire test litùrgich

Sìmbol nissen-costantinopolitan

I chërdoma ant un sol De, Pare tut-potent, Creator dël cel e dla tèra, ëd tut lòn ch’as ved e ch’as peul nen vëdde.
I chërdoma ant un sol Signor Gesù Crist, unigènit Fieul ëd De, generà dal Pare prima ‘d tùit ij sècoj, lus da lus, De gènit da De gènit, generà nen fàit, dl’istèssa sostansa dël Pare. A l’é stàit Chiel ël mojen dla creassion ëd tute le còse Për nojàutri e për la nòstra salvëssa a l’é calà giù dal cel, a l’è fasse carn për ël mojen dl’Ëspìrit Sant e ‘d Marìa vèrgin; a l’é fasse òm e a l’é stàit butà ‘n cros për nojàutri ant ël temp ëd Pònsio Pilat; a l’ha patì; a l’é stàit sotrà e a l’é arsussità ël ters dì conforma le Scriture; a l’é montà su al cel andoa a l’é setasse a la drita ‘d De; a l’ha torna (na sconda vira) da vën-e an glòria për giudiché ij viv e ij mòrt, e sò regn a l’avrà mai na fin.
I chërdoma ant l’Ëspìrit sant, ël Signor, Col ch’a dà vita, Col ch’a l’é mandà dal Pare e dal Fieul; Col che, con ël Pare e con ël Fieul, a l’é adorà e glorificà; Col ch’a l’ha parlà për ël mojen dij profèta.
I chërdoma ant na sola Cesa, santa, catòlica (universal) e apostolica.
I confëssoma ‘n sol batèisim për la remission dij pecà.
I spetoma l’arsuression dij mòrt e la vita dël sécol ch’a vnirà. Amen.

Dle Confession ëd fej con espression bìbliche

1.
I chërdoma an De ‘l Pare: da Chiel i l’oma la vita e l’esistensa.
I chërdoma an Gesù Crist, Sò Fieul, nòst ùnich Signor. An Chiel i l’oma ‘l përdon dij pecà e la vita eterna.
I chërdoma ant l’Ëspìrit Sant, Spìrit ëd vrità e d’amor. Chiel an trasforma tanme creature neuve.
I chërdoma ant la comunion ëd coj che ‘l Salvator a l’ha riscatà e ch’arsèiv për ël mojen da sòa Paròla ant la Cesa, dont Chiel a l’é ‘l sol Cap
I chërdoma ant la vënùa dël Regn ëd De e i spetoma, conforma Soa promëssa dij neuv cel e na neuva tèra, andoa a-i sarà la giustissia.

2.
I chërdoma che De a l’é spìrit. A venta che coj ch’a-j rendo l’adorassion, a l’adoro an ëspirit e an vrità. I chërdoma che De al l’é amor. Tùit coj ch’a l’han l’amor a son nà da De e a conòsso De. I chërdoma che Gesù a l’é la Paròla ‘d De. Nosgnor a l’ha dane la vita eterna e costa vita a l’é an sò Fieul. I chërdoma che i soma fieuj ‘d De e che De a l’ha dane Sò Spìrit. I chërdoma che, s’i confëssoma nòstri pecà, De a l’é fedel e giust e a-j përdonrà. I chërdoma che ‘l mond a passa con soa concupissensa, ma che chi ch’a fà ‘l volèj ‘d De a resta për sèmper.

Dossologìe

Gloria in excelsis

Glòria a De ant ij leugh motobin àut e pas an tèra antra j’òm che Chiel a gradìss. Nojàutri at làudoma, at adoroma e at doma glòria, at disoma grassie për la granda toa glòria. Signor De, Re dël cel, Pare tut potent, Signor Fieul unigènit, Gesù Crist, Signor e De, Agnel ëd De, Fieul dël Pare. Ti ch’it tire via ij pecà dël mond, àbie pietà ‘d noi. Ti ch’it tire via ij pecà dël mond, scota nòstra orassion. Ti ch’it ëstas setà a la drita dël Pare, àbie pietà ‘d noi. Përchè mach Ti’t ses sant, mach Ti ‘l Signor, mach Ti motobin àut, Gesù Crist, con l’Ëspìrit sant, ant la glòria ‘d De Padre. Amen.
Glòria

Glòria al Pare, al Fieul e a l’Ëspìrit Sant, tanme ch’a l’era al prinsìpi, a l’é ora e a sarà sèmper, ant ij secoj dij secoj. Amen.
Sanctus

Sant, sant, sant a l’é ‘l Signor dj’esèrcit: ij cej e la tèra a son pien ëd toa glòria. Osana ant ij leugh motobin àut! Benedì a l’é Col ch’a ven ant ël Nòm dël Signor!
Te Deum

Nojàutri it laudoma, ò Signor, it confëssoma. Ti, Pare etern, tuta la tèra a onora. A ti j’àngej tuit; a Ti ij cej e le potense; a Ti ij cherubi-n e ij serafì-n, a canto con vos contìnua: Sant, sant, sant, a l’é ‘l Signor, De dj’esèrcit; ij cej e la tèra a son pien ëd toa glòria. Ël glorios còro dj’apòstoj, dij profèta la laudàbil strop, dij màrtir ël candi esèrcit, at làuda. An tuta la tèra la santa Cesa a confëssa Ti, o Pare ‘d maestà sensa mzura, ansema al adoràbil Tò ver e ùnich Fieul. E ‘l sant’Ëspìrit ch’a consola. Ti ‘t ses ël Re dla glòria; Crist, Ti dël Pare ‘t ses ël Fieul etern. Ti, për delivré l’òm it l’has nen avù afror dël vènter ëd na virgin. Ti, vinciùa la mòrt, it l’has duvertà aj chërdent ël cel. Ti ‘t ses sëtà a la drita ‘d De, ant la glòria dël Pare. Da ‘ndova i chërdoma che Giudes it torneras. Për cost motiv nojàutri it suplicoma ‘d giuté ij tò serv che’t l’has riscatà con tò sangh. Fà che, ansema ij tò sant ant l’eterna glòria nojàutri i sio contà. Fa ch’a sia salv, ò Signor, Tò pòpol. Benedìss Toa ardità, guèrnala, susten-la fin-a a l’eternità. Tùit ij dì i benedissoma e laudoma Tò Nom për ij sècoj. Compiass-te, Signor, an cost dì, ‘d conservene sensa pecà. Abie pietà ‘d nojàutri. Ch’a ven-a, Signor, toa misericòrdia an sù noiàutri ch’i l’oma sperà ‘n Ti, Signor. Fà ch’i sia nen confus an etern. Amen.

Nessun commento:

Posta un commento